STORY TELLING CONTEST-10

 

കയ്യിലുള്ളത് കാണാത്തവർ

പ്രാവ് തന്റെ കൂട്ടിൽ സുഖമായി കഴിയുകയായിരുന്നു. രാവിലെ കൂടിനു പുറത്തിറങ്ങും, ധാന്യക്കതിരുകളെല്ലാം തിന്ന് വൈകിട്ടു തിരികെയെത്തും. കാക്കയ്ക്ക് ഈ ദിനചര്യ ഇഷ്ടപ്പെട്ടു. അതു സൗഹൃദക്കൂട്ടി പ്രാവിന്റെയടുത്തെത്തി. അതേ കൂട്ടിൽ താമസവും ആരംഭിച്ചു. കുറച്ചുകഴിഞ്ഞപ്പോൾ കാക്കയ്ക്കു മാംസവും മീനും വേണമെന്ന് ആഗ്രഹം തോന്നി.

ഒരു നാൾ പ്രാവ് തീറ്റ തേടി പോയ സമയം കാക്ക, തൊട്ടടുത്ത വീട്ടിൽ വറുത്തുകൊണ്ടിരുന്ന മീൻ മോഷ്ടിക്കാനെത്തി. പക്ഷേ, പാത്രത്തിൽ തട്ടി അത് അടുപ്പിനരികിലേക്കു വീണു. പാചകക്കാരൻ അതിനെ പിടിച്ച് പാതി തൂവലുകൾ പറിച്ചുകളഞ്ഞു. വേദനയോടെ കഷ്ടപ്പെട്ട് അതു പ്രാവിൻകൂട്ടിലെത്തി. വൈകിട്ട് കൂട്ടിലെത്തിയ പ്രാവ് കാര്യമറിഞ്ഞപ്പോൾ അവിടുന്ന് ഭയന്ന് പറന്നുപോയി.

സന്തൃപ്തി ഒരു സാധാരണ സംഗതിയല്ല. എന്തു കിട്ടിയാലും തൃപ്തി വരില്ല എന്നതാണ് സാധാരണപ്രകൃതം. ഉള്ളതിൽ സന്തോഷമുണ്ടാകുകയും അധികം വേണ്ടതിനായി വിവേകത്തോടെ കർമനിരതരാകുകയും ചെയ്യുന്നതാണ് സന്തൃപ്തി. കയ്യിലുള്ളതിൽ ആത്മഹർഷമില്ലാതെ പുറമേയുള്ളതിൽ മാത്രം ശ്രദ്ധവയ്ക്കുന്നതാണ് അത്യാഗ്രഹം. എനിക്കുള്ളതിൽ ഞാൻ സംതൃപ്തനാണെന്ന മനോഭാവമുള്ളവരും അപ്പുറത്തുള്ള നല്ലതുകൂടി കിട്ടിയാലേ എനിക്കു സംതൃപ്തി വരൂ എന്ന മനോഭാവമുള്ളവരും തമ്മിലുള്ള വ്യത്യാസം ആത്മസന്തൃപ്തിയുടേതും ആർത്തിയുടേതുമാണ്. രണ്ടാമത്തെ കൂട്ടരുടെ കൂട്ടിച്ചേരലിന്റെയും കൂട്ടുകൂടലിന്റെയും ഉദ്ദേശ്യംപോലും കൂടുതലെന്തെങ്കിലും കിട്ടുക എന്നതായിരിക്കും.

അതിമോഹത്തിന്റെ പ്രശ്നം അത് ആത്മസുരക്ഷയെപ്പോലും അവഗണിക്കും എന്നതാണ്. ചെറിയ പ്രലോഭനങ്ങളിൽപ്പോലും വീഴുകയും നിസ്സാരമായവയ്ക്ക് അമിതവില കൽപിച്ച് അതിനുവേണ്ടി ജീവിതം ഹോമിക്കുകയും ചെയ്യും. അസന്തുഷ്ടരെല്ലാം യുക്തിരഹിതമായി പ്രവർത്തിച്ചു തുടങ്ങും. അനിയന്ത്രിതമായ ആഗ്രഹങ്ങളെ വരുതിയിലാക്കാൻ കഴിയുന്ന ആത്മനിയന്ത്രണമാണ് അനുദിന വളർച്ച ആഗ്രഹിക്കുന്നവർക്കുണ്ടാകേണ്ടത്. എല്ലാ അഭിലാഷങ്ങളുടെയും പൂർത്തീകരിക്കും എന്നതല്ല ജീവിത വിജയത്തിന്റെ അടയാളം. അത്യാവശ്യമായവയെയും അടിസ്ഥാനമായവയെയും ഉപേക്ഷിക്കാതെ, അനാവശ്യമായവയെ അവഗണിക്കാൻ കഴിയുന്നതാണ് യഥാർത്ഥസന്തൃപ്തി. എന്തിനെയാണ് പിന്തുടരേണ്ടത് എന്ന തിരിച്ചറിവാണത്.